اختى واختكم عتاب

بس الله الرحمن الرحيم . هذه قصة
اخت لنا جميعا لعلى الوحيد هنا الذى سمعت عنها ولكن اردت ان تقرؤها وان
تدعوا لها بالمغفرة والرحمه ...

بالله عليكم ان تقرؤها

هذه قصتها قالتها بنفسها منذ ايام قليله قبل مرضها و رحيلها اتركم مع القصه حيث كتبت بأحد المنتديات قصتها ليساعدها اخوانها

تقول
:
السلام عليكم ورحمة الله وبركاته

اعذروني ف اختياري للعنوان .........بس اقسم لكم كلكم ان ده اقل حاجه ممكن توصف اللي انا بعيشه دلوات

تخيلو بعد ما حياتك كانت مليانه كل حاجه كويسه ....... افراح وسعاده ..........فجأه تلاقي كل حاجه حلوه راحت......... ليه؟؟؟

الحياه دي بدأت بالتحديد بعد وفاة والدي _الله يرحمه_ كان والدي كل حاجه ف حياتي انا واخويا

كان بيشتغل مهندس بترول كان كل شهر ف
دوله معينه مكنش بيقعد معانا كتير بس برغم كده كنا بنحس بحنانه بيغطينا
وبيزيد برغم بعد المسافه بيننا

ياه لما كان بينزل اجازه اسبوع او اسبوعين كان ناقص يشيل رموش عنيه ويحطنا مكانها

طبعا كلكم بتسألو طب والدتك فين من كل ده؟؟؟؟

والدتي بعد ما كانت دكتوره صيدليه بتدير بدل الصيدليه 3 وبتروح وتيجي علينا جالها leukemia

اقسم ليكم انها ما كانت الا هيكل عظمي نايم ف السرير

مجرد نفس طالع نازل ولا اكتر ولا اقل

علشان كده كان والدي كل حاجه ف حياتنا هو الام والاب لينا

كنا متوقعين وفاة والدتي ف اي يوم من الايام

لحد مافي يوم من ابشع الايام ف حياتي
حصلت حاجه غير متوقعه بالمره وهي وفاة والدي بدون اي اسباب غير سبب وحيد
مقنع جدن (فاذا جاء أجلهم لا يستأخرون ساعة ولا يستقدمون)

متتخيلوش حياتنا كانت عامله ازاي ............ابونا وامنا واخونا واختنا وكل حياننا راح فجأه

مكنش قدامي غير اني ارضى بالامر الواقع بالذات ان اخويا لسه صغير ومش عارف حاجه ومحتاج اني اكون جامده علشان اقدر ارعاه

الحمد لله رضيت بقضاء ربنا وكنت بحاول اخرج من الحزن اللي انا فيه باي طريقه

طبعا كل الفتره دي حالة والدتي بتسوء يوم عن يوم ....بس عارفين برغم انها مكنتش حاسه بينا

ولا عارفه اي حد بس كان مجرد وجودها ف البيت كان بيدينا امان وطمأنينه

وف يوم من الايام وبعد وفاة والدي بتقريبا 7 شهور حصل المتوقع واتوفت والدتي_ربنا يرحمها_

تخيلو بقا ف خلال سنه واحده حياتك كلها تتلخبط كده .....

النعيم اللي انت كنت عايش فيه خلاص انتهى ..........

بجد احساس صعب قوي والله

بس هتعمل ايه ؟؟؟ مفيش غير انك تتقبل الوضع وترضى بالامر الواقع وتعيش

وفعلا هو ده اللي اتعمل

جه جدي والد والدتي عاش معانا ........علشان نبقا منسؤلين من حد يحمينا ويحافظ علينا

كان كل همه انه يرضينا باي طريقه .... يعوضنا عن الايام السوده اللي عشناها دي

اي نعم مكنش بيفهمني زي والدي الله يرحمه بس عمره مقصر معانا

يمكن كنت اوقات كتير بدايق منه علشان كل مقولله هروح ف مكان يوافق وميعارضنيش

ويقوللي انا واثق فيكي _انا ف امس الحاجه اني الاقي حد يحاسبني ويقوللي رايحه فين وجيه منين

ورجعتي متاخر ليه ومتعمليش كذا واعملي كذا_ بس ده ميمنعش اني لقيت معاه كل حاجه كويسه

بعد ما جه جدي عاش معانا بحوالي 3 شهور اتعرفت على بنت زميلتي ف الكليه وقربت منها قوي

عرفتني على ابن خالتها عن طريق الايميل

اقسم ليكم انها طلبت ايميلي مره تتكلم من عليه .....وافقت ولما رجعتهولي تاني

كنت اون لاين ف يوم ولقيت الشخص ده اون لاين...سالني انتي مين؟؟؟

مكنتش عارفه مين ده ؟؟؟لان كل اللي عندي اعرفهم كويس قوي

ولما سالتها انتي ضفتي حد ع الميل بتاعي؟؟؟قالتلي اه اخويا وابن خالتي

اول مره كلمته شديت معاه وشد معايا قاللي بنفس اللفظ انتي مين انا مبكلمش بنات

قلتله يعني انا اللي بكلم ولاد ....عموما في اسلوب احسن من كده سلام

تاني مره لما عرفت منها الحقيقه.... لقيته اون لاين حبيت اعرفه الحقيقه

قلتله انا فلانه زميلة قريبتك واللي حصل كذا كذا

قاللي مفيش اي مشكله واعتذرلي وانا اعتذرتله

ايامها كانت النتيجه لسه ظاهره سالني عملتي ايه وناويه تعملي ايه

اتكلمت معاه ولقتني بحكي ليه عن حاجات حصلتلي محدش كان يعرفها غير والدي الله يرحمه

بقيت الاقي منه ردود عقلانيه قوي ومقنعه جدن

مكنتش اعرف عنه اي حاجه غير الايميل وهو كذلك

لحد مافي يوم عرفت من صحبتي دي ان والدته اتوفت ....سبت ليه رساله اوف لاين اعزيه فيها

فات وقت كتير قوي معرفش عنه اي حاجه خالص

لحد ما في يوم لقيت منه رساله اوف لاين انه كويس وان ده رقم تليفونه واني اطمنه عليا كل فتره

سيفت الرقم عندي ...اتصلت بعدها بحوالي شهر انا فلانه اللي كلمتك اخبارك يارب تكون بخير

قاللي انا كويس بس والدي تعبان شوية وعامل عمليه وانا معاه

بقيت بتصل كل يوم اطمن على والده ... كل مره كنت بكلمه كنت بقرب منه اكتر

بجد كنت ف الوقت ده ف امس الحاجه مش اني اكلم حد لاء اني بس الاقي ايد حنينه تطبطب عليا

بدأ يحكيلي عن حياته وانا كذلك احكيله عن كل حاجه

مكنتش بفكر ايه اللي هحكيه ايه اللي هقوله

كنت بحس اني بكلم نفسي وانا معاه ...وهو بجد كان بيديني كل حناان وامان

وف يوم من الايام اتوفى جدي.........
واختى الوحيده اللي عايشه ف السعوديه اخدت اخويا الصغير يعيش معاها وانا
روحت بلاجبار اعيش مع خالي

لانه كان الوصي عليا بعد جدي.... عمري مشفت قسوة اكتر من كده

معندوش قلب .........كان بيعاملني على اني حيوانه .........كله همه انه ياخد مني فلوسي

بالذوق او بالعافيه ......... وعيلتي كلهم بيخافو منه لان كل واحد منهم ف مسافر وسايب مصالحه وهو الوحيد اللي ف مصر وبيراعي مصالحهم

هيعطلو مصالحهم علشان ايه وعلشان مين؟؟؟

كل يوم كان بيزيد قسوه ....اقسم ليكم
بالله انه اوقات كان بيخليني ابات ف البيت لوحدي ويقطع النور عني...علشان
مش راضيه اقولله دهب امي فين او انا بصرف منين

المعاش كان بياخده.......والله ما ساب اي حاجه وحشه معملهاش معايا

ليه القسوه دي...اعتبرني بنت من بناتك ...بلاش كده ....ده الرسول بيقول انا وكافل اليتيم كاهتين ف الجنه

اكسب في ثواب وخليك حنين عليا.........بس هتقول لمين ومين يسمع

لا حياة لمن تنادي

كان المنفذ الوحيد للعذاب ده هو الولد اللي كنت بكلمه ........... كنت بتصل بيه اعيط

هصرف منين وهعيش ازاي .......... كان بيديني فلوس اصرف

وعمره محسسني اني قليله بالعكس كان دايما يعمللي سبورت جامد ويصبرني

وف نفس الوقت عمر العلاقه بيننا ما اتطورت لحاجه تانيه

كلامنا كله عن احوالنا والدنيا وهنعمل ايه وبكره هيكون ايه

وانا عمري مسالت نفسي هو ايه بالنسبه ليا........بس الاكيد انه كان حاجه كبيره قوي ف حياتي

حاجه وجودها ف حياتي بيفرق معايا كتير قوي

زي ماهو كان بيعمللي كل حاجه كويسه انا عمري متررددت اني اعمل ليه كل حاجه كويسه

ودلواتي وبعد ما سجن خالي اتفك عني وسبت ليه كل حاجه وبقيت بشتغل وبصرف على نفسي

بلاضافه للفلوس اللي اختي بتبعتهالي اكفي مصاريف دراستي وكتبي ودروسي


لقيته بيقوللي انه بيحبني بس الظروف كلها ضده ...... وانه ممكن يخطب ف اي وقت

ياااااااااااااااااااااااااااه.............. انا بعيش نفس يوم وفاة والدي بالظبط


ازاي ........زي بالظبط متكون والدتك متوفيه ووالدك يتجوز بتحس ان حد اخده منك

مش قاااااااااادره اسدق........... مش عارفه اعيش ........

حاولت اقرب من اختي يمكن الاقي عندها احساس الامومه

اختي دي زي الطفله متعرفش اي حاجه ف الدنيا غير زوجحها وولادها

لو حكيت ليها على مشكلع تعيط جمبي وكل اللي تعمله تقوللي خدي الفلوس دي اهي هاتي اللي انتي عاوزاه

انا مش محتاجه فلوس والله يارتني كنت بنت نااس شحاتين بس كانت عيلتي تبقا مستقره

انا محتاجه حنانك وعطفك .......... مش عاوزه تفهمني

ودلوات انا خلاص بقيت لوحدي........ لما بكلم الولد ده بيكلمني باسوب وحش قوي

قاللي اخر مره لو في حاجه مفيده نتكلم فيها اوك مفيش يبقا ياريت بلاش تتصلي

انا والله بموت

انا المفروض اني مسافره اعمل عمره ........ مش عارفه اسافر

مش عارفه اعمل اي حاجه

مش متخيله ان ممكن حد يبقا كل حياته ويشغله عني

بجد بمووووووووووووووووووووووووووووووووووت

والله بموووووووووووووووووووووووووووووووووووت

ارجوووووووووووووكم قولولي اعمل ايه

بس اؤكد ليكم اني حاولت انسااااااااااااااااااه ...........بس معرفتش

مش لاقيه حد ف حنيته عليا........ مش لاقيه حد يفهمني زيه

بجد انا عمري محبيت حد قده

انا بتمنى اموت قبل معرف انه خطب او اتجوز

ارجوكم ساعدوني


بهذه الكلمات انتهت بداية قصتها

كتبت وقالت فى تانى واخر موضوع لها قائله

السلام عليكم جميعا

انا أختكم عتاب ........... يارب تكونوا لسه فاكرينني


زي مانا افتكرتكم في عمرتي ................


ودعيت ليكم كتير قوي زي ما وصتوني

وبالاخص انين وضياء الدعوه ربنا يحفظهم


بس زي ما انا دعيت ليكم استحلفكم بالله ان تدعولي من قلويكم

ربنا يشفيني ويصفح عني وقبل كل ده يصبرني

فاكرين لما نزلت موضوع ساعدوني بالله عليكم انا بموت

حقيقي انا لقيت فيكم نعم الاخوه والاخوات اللي وقفوا جمبي وخرجوني من محنتي

والنهارده كل عشمي انكم تقفوا جمبي بدعواتكم ليا

طبعا كلكم عارفين اني كنت سافرت لاداء العمره وربنا يشهد اني بقيت واحده تانيه خالص

واحده من يوم ما خطت باب الحرم اخدت عهد على نفسها ان قلبها ده ميتعلقش بغير ربنا

والحمد لله ربنا هداني لحاجات كتير كويسه وبقيت احسن من الاول بكتير قوي

وبتمني اني اكون احسن واحسن ......

انا عملت حادثه يوم 20رمضان وانا راجعه من الحرم للسكن .......

العربيه اتقلبت بيا انا والسواق

السواق اتوفى ...........ربنا يرحمه يارب

وانا محستش باي حاجه غير بعد 4 ايام من الحادثه .....

حصللي كسرف الجمجمه لكن الخبطه اثرت اكتر على مركز البصر في المخ

علشان كده لما فقت بعد 4 ايام مشفتش اي حاجه

عملت عمليه ف المخ والحمد لله بيت احسن

لكن عملية العين الدكاتره اكدوا ان نسبة الشفاء لن تتعدى ال10%

لكن برغم ده انا هاخد بالاسباب وهعملها وكل حاجه باذن الله ان شاء الله

سدقوني انا كلامي معاكم قبل سفري فرق معايا كتير قوي

يمكن لو كان اللي حصل ده حصل قبل شهر واحد بالظبط مكنش ده هيبقا رد فعلي

لكن سدقوني برغم ان الابتلاء صعب قوي المره ده ........

لكني سأصبر وكل رضى بقضاء الله وقدره


لكني حقيقي محتاجه دعواتكم ليا ......دعوات اخ واخت لاختهم ان ربنا يصبرها

متتخيلوش قد ايه احساس صعب وانا قاعه جمب اختي وانا بمليها الكلام وهي بتكتب

لاني مبقتش اقدر اشوف واكتب واقرأ.........


لا استطيع الا ان اقول الحمد لله على كل حال

استحلفكم بالله لا تبخلوا عليا بدعواتكم


ويارب انين تشوف رسالتي دي هي وضياء الدعوه

وانا بعتذر ليهم عن تقصيري وعدم سؤالي بس والله دي كانت ظروفي اللي بعدتني عن كل الناس

وتاكدوا اني منستكومش ابدا

وكلامكم ليا وطاقة التقرب الا الله اللي ادتوهالي قبل السفر ملزماني دايما

وان شاء الله عمري مهياس من رحمة ربنا

اسالكم خالص الدعاء

اختكم عتاب


وسافرت للعمليه ومرت بسلام واخبرنا بذلك احد اقاربها وتمنى الجميع لها التوفيق

ولكن وصلت هذة الرساله لأعضاء المنتدى


والله لقد ترددت كثيرا في دخولي اليوم

وما جعلني ان ادخل هو عدم قدرتي ان اتصل بالدكتوره أنين

اختي عتاب توفاها الله ثالث يوم العمليه

الى الان لا استطيع ان اصدق نفسي خاصه بعد ان كلمتني يومها في الفجر

وطلبت مني ان ادعي لها وان اكلم د.انين واطمئنها عليها

كل ما استطيع فعله هو ان اصلي وادعي لها ان يرحمها الله ويسكنها فسيح جناته

وانتم كلي امل انكم لن تنسوها في دعائكم

وانتي يا انين اعذريني اني لا استطيع الاتصال بكي

يوم الوفاه في الفجر كانت المكالمه كلها عنكي وعن اسرتك ومدى حبها لكم

وانا واثقه انكي تحبينها اكثر ارجوكي تذكريها في دعائك

ولا تنسيني بالدعاء ان يلهمني الله الصبر


هذه القصه لم يمر عليها الا ايام قليله ... وهى واحده
من قصص كثيره ولكنها حدثت اما اعيننا ... فيا غافلا والموت يطلبه اعتبر
فهكذا الدنيا ولمثل هذا فاليعمل العاملون

ارجوكم يا اخوانى ان تدعوا لها لاننا سنكون مكانها قريبا او بعيدا وقتها سنحتاج لمثل هذا الدعاء ....

اعزرونى على الاطاله والسلام عليكم ورحمة الله وبركاته