انتا بتدخل المنتدى ليه ؟

السلام عليكم جميعاً
انا متشكرة جداااااا لكل الناس اللى سألت عليا فى غيابى ، ربنا يكرمهم جميعاً وطبعاً مبارك لكل الناجحين مبارك وعقبال التخرج ، ان شاء الله .
انا اخترت عنوان الموضوع ده : انتا بتدخل المنتدى ليه ؟ عشان هدفين اتنين بالتحديد
الأول : نوضع اهداف واقعية وحقيقية للمنتدى بتعنا وهفصل الكلام فى ده ان شاء الله
الثانى : ليه الاعضاء مش بيدخلوا كتير فى المنتدى ، واللى بتبعتله دعوى من اصحبنا ، عشان ميزعلانش يدخل يكتب اسمه ويطلع وهفصل الكلام فى النقطة دى ان شاء الله
...................
اولاً: لازم تكونوا عارفين حاجه مهمه انا لو المنتدى ميهمنيش مكنتش كتبت موضوع ولا حتى فكرت فى ده ، ومن المنطلق ده مش عاوزه حد يزعل منى ، وبكررها مش عاوزه حد يزعل منى ، يا جماعة لازم قبل ما نفكر فى انتخابات المنتدى لازم نفكر ايه هى اهداف المنتدى وبالتحديد ، معلش ازهراوى مع تحفظى الشديد لحاجات كتير فيه بس اهدافة واضحه جدااا ومحددة جددا عشان كده احنا دخلناه وعرفنا بعض من هناك ، ايه اللى ممكن نقدمه وننفع بعض ؟ ايه مميزات المنتدى بتعنا عن غيره من المنتديات ؟ طبعا ايد لوحدها متصقفش كل واحد يقول ايه سبب دخوله المنتدى ،وبصراحة بصراحة بصراحة ومن هنا نقدر نجمع الميول ونميها لحد مهنوصل لاهداف ترضى الجميع .
ثانياً:انتا ليه مش بتدخل المنتدى كتير ؟ سؤال بساله لنفسى وليكم لو عايزين بجد حل ، ولازم عشان نلاقى حل نتكلم بكل صراااااااااااااااااااااااحة بدون تحفظ .

السلام عليكم
بصفتى انا اللى كتبت الموضوع ، لازم اكون من اول الناس اللى هترد - ان شاء الله - هجاوبكم بشىء من التفصيل يعنى زى ما بيقولوا كلام من غير اطناب ممل ولا ايجاز مخل .
اولاً- عشان اجاوب بصراحة مطلقة لازم احكى الحكاية من اولها واولها ان فاطمة احمد واحده فى الثانوية الازهريه كل اللى نفسها فيه مجموع يدخلها الكليه اللى بتحلم بيها ، فاطمة ومعندهاش حاجه تعطلها عن ده يعنى ملهاش اصدقاء وقرايبها بتشوفهم كل سنة مرة ده اذا حصل وشفتهم يعنى من الاخر واحده منعزله عن الناس بصفه كليه اخرها تنزل تشترى حاجه ، طيب فاطمة كانت ازاى بتعرف الدنيا ماشية ازاى طبعا من التلفزيزن بتشوف ايه اللى الناس بتعمله فى بعض فكانت بتحذر انها تتعمل مع الناس الا من بعيد لانها خايفة ليضروها
ثانياً- ظهرت نتيجة الثانوية والحمدد لله فاطمة جابت 91.2 % من غير متغش ولا كلمة الحمد لله لكن مجموعها ميدخلهاش الكلية اللى كانت عندها كافه والناس فى كافه ، اصبحت فاطمة بلا معنى لا مستقبل لا اصحاب لا اى حاجه كل اللى كانت تعرفه عن النت جوجل فقط لا غير لا تفقه شىء فى النت الا جوجل طبعا عدت عليها اجازة الثانوية باعجوبه دخلت الكليه وهى محطمة داخله قسم مش حباه مفروض عليها ، مفتحتش كتاب لانها مش عاوزه تنجح لان النجاحفى القسم ده مش بيمثل ليها شىء المهم فاضل على الامتحان شهر اضطرت فاطمة تفتح الكتب وفجاه بدون مقدمات عرفت فاطمة موضوع الماسنجر بالصدفه البحته وبعدين اخوها عرفها ازاى تدخل على الشات وازاى تعمل ايميل
ثالثاً- طبعااااااااا مفجاه ايه ده هو فى حاجه كده ، ينفع انى اكلم كل الناس دى من وانا هنا فى بيتى اقدر اعرف كل اسرارهم ومشاكلهم بجد متعة فظيعة انك تعرف كل الناس دى وتكلم كل الناس دى وانتا قبل كده مكنتش لاقى بنى ادم واحد يكلمك طبعا الشات والماسنجر بقى بجد حياتى لفتره شهرين او ما يقرب من ذلك المهم عرفت ناس كتير ولان ربنا بيحبنى انى كنت بخاف من ربنا جدا فكنت بتكلم مع كل الاصناف الناس الكويسه والاذكياء وده النوع اللى بيعجبنى الكلام معاهم ونوع تانى كنت بفرض عليهم اسلوب معين فى الكلام يعنى عجبكم تتكلموا فى ده اوك مش عاجب فى داهيه لانهم كانوا زباله ، وطبعااا كل ده وانا فى قمه السعادة
رابعاً- فجاة نداء داخلى: ايه اللى بتعمليه ده يا فاطمة بتضيعى عمرك ادام النت ؟ ايه لزمتها تكلمى ولد وتضيفى ايميله حتى ولو كان ظاهرا انه محترم؟ لما ربنا يسالك يوم القيامة عمرك افنتيه فى ايه ؟ هقول يا رب كنت على الماسنجر برغى مع اولاد وبنات ايوه انتا علام يا رب ان عمرى مقولت حاجه حرام بس ايه فايدة الكلام الفاضى الرغى اللى ملهوش لزمه ، المهم فاطمة قررت تغير اتجاها حاولت تصلح من الناس دى ونجحت فى الاول لكن بعد كده فشلت
خامساً- رعاية ربنا فاطمة قررت تشيل كل ايميلات الولاد اللى ضفتهم عندها على الايميل ، الشيطان يقول لفاطمة : ليه يا بنتى هو انتى بتعملى حاجه حرام ؟ ده انتى بتتكلمى بكل ادب ولو الولد طلع سافل خلاصى مش بتردى عليه يبقى فين الحرام ؟ يعنى عاجبك قعدتك ذى قرد قطع كده تكلمى نفسك زى المجانيين ، لكن رعاية ربنا وكرمة كان كبير اوى ربنا كرم فاطمة بتقدير امتياز وطلعت الاولى على الدفعة ، ياااااااا ربنا كريم معايا للدرجة دى ؟ اه خلاص مفيش كلام مع ولاد على الايميل بعد النهارده وبفضل الله تم مسح كل الايميلات وطوز فى الشيطان ايه يعنى اكلم نفسى فيها ايه
سادساً- طبعا صعب اسيب النت كده خالص اعمل ايه اعمل ايه ايوه لاقتها منتدى ازهراوى اهو كله ازهريه وناس محترمة وحتى لو كلمت ولاد اهو ادام الكل يعنى مفيش حرمانيه

الحمد لله دخلت ازهراوى عملت 50 مشكله وفى كل حته اعمل مشكله والادارة تتلم المهم دخلت قسم كلية الطب ،لقيت ناس دمها خفيف وبتهزر على الملاء قولت خير الحمد لله دخلت وحصلت مشكلة ، طبعاً الكل عارفها ، وبعدين جاتلى رساله خاصة بتدعونى للمنتدى دة الحمد لله خلصت من ازهراوى ولقيت ناس فريش مش ناس تخنء المهم ركزت فى المنتدى الجديد وبعدين الدراسه بدات قعدت فترة على المنتدى الجديد ، طبعا الجماعة فى البيت مش عجبهم ، كده التقدير هيضيع النت مش هينفعك؟ اخرت النت ايه ؟ الندم مش هيرجع التقدير لو ضاع ، النت مش هيشغلنى ولا هياكلنى عيش المهم افتكرت قول الله عز وجل " ومن يبدل نعمت الله من بعد ما جاءته فان الله شديد العقاب " فعلا سيبت المنتدى الجديد عشان المذاكره طيب الاجازه جت ليه يا فاطمة مش بتدخلى المنتدى او غيرة الا بسيط جدااااا؟
عشان انا عندى 3/4 القرآن الكريم لازم ان شاء الله يتحفظ كويس جداااااا ، طيب لو ربنا كرمنى واتعينت لازم اكون مميزه ، طيب ازاى اكون مميزة ، عشان اكون مميزة لازم استثمر الوقت اللى اغلب الناس بتضيعة وتقول "اصل انا في اجازة" طيب هتعملى ايه يعنى ؟ هحفظ قران كريم هروح للشيخ هحاول اشوف ايه اللى ناقصنى واكمله فى الاجازة ، وبفضل الله وكرمة ونعمتة عليا يعنى مشيت شويه ، والحمد لله اكتشفت ان فعلا فعلا " عمرى اغلى من انى اضيعه على الشات ولا الماسنجر ولا ازهراوى ولا غيره ولا غيره " ده ميمنعش انى ادخل بس فى حدود فى فترات متباعدة لما احس انى اتخنئت جداااا من اللى انا بعمله
*طبعاا البعض بيسال : هى دى مش بتتكسف ؟ ازاى تتكلم بوضوح اوى كده ؟ مش خايفه حد يفتكر عنها حاجه وحشه ؟
انا ميهمنيش كل ده عشان انا حبيت اقولكم راى بكل صراحة وربنا عالم انى بفضله وكرمة عمرى معملت حاجه اتكسف منها وربنا عالم انه عندى كان اكبر من اى حد حتى لو كنت بكلم ولد على ايميلى المهم وجعت راسكم مش مهم سامحونى كنت بعوض غيابى ، يااااارب حد يرد على الموضوع
سلام عليكم جميعا

اولاً- فى نقطة اشترك فيها الباش مهندس احمد مع الدكتور مهدى وهى ان الكلام اللى كتبته ده كلام جميل ، سبحان الله ! بجد انا كنت متوقعة حاجة غير كده خالص ، حقيقى انا كنت متوقعة ان هيتقال دى بت بجحة حد يتكلم كده من غير كسوف ، يعنى اكيد فى ناس بتفكر كده ،فى نوع من الناس يحبوا يترسموا ويبينوا للى حولهم انهم ملائكة ، بس الواضح انكم من النوع اللى صادق مع نفسه ومع الناس عشان كده عجبكم الكلام ،فعلاً مفيش احسن من ان الواحد يتكلم بصراحة ، على العموم متشكرة جداا
ثانياً- بالنسبة للباش مهندس طبعاً متشكرة جدا على الرد ، وربنا يوفقنى ويوفقك ً زميلانا اللى هنا على المنتدى وكل المسلمين ، بس بصراحة انتا قولت كام جملة بجد معتقدش انى اسمعهم من ولد فى الزمن اللى احنا فيه ده ،يا رب كل البنات يبقوا زى ! سبحان الله انا اللى اعرفه ان الناس فى الزمن ده -طبعا مش الكل- يحبوا اللى يسرح بيهم ويترسم وكده يعنى ، بكل اسف متفهمش الناس دى بتضحك على مين بالضبط على نفسها ولا على اللى حوليها ، ؟ وده بيكون سبب مشاكل ومصايب كتير ، مثلاً تلاقى الواحدة وهى مخطوبة تقعد تعمل فيها رقيقة وبتتكلم بصوت واطى وتقعد تافلم على الراجل الغلبان اللى هيخطبها ،وهو كمان يترسم عليها وفى الاخر يتجوزوا يكتشفوا بعض على حقيقتهم ، بس بعد ايه بعد لما يكونوا جابوا عيل ولا عيلين وساعتها تبقى المشكله اكبر ، بكل اسف دى بقت فلسفة عند اغلب الناس معتقدين انهم لما يتكلموا بصراحة مطلقة انهم هيخسروا اللى حوليهم ، وممكن ده يكون فعلا واقع لكن فى المقابل انهم هيكسبوا حاجة اهم وهى ثقتهم فى نفسم ، على العموم متشكرة جدا مش عشان رايك كان فى صفى ، لانى واجب على انى احترم وجهه نظرك ، لكن متشكرة عشان انتا رديت على الموضوع ،ووعد بجد تبقوا تدعولى وانتوا بتصلوا وفى صلاة التراويح فى رمضان وانا اوعدكم انى ان شاء الله هدعلكم كلكم .
ثالثاً- الدكتور مهدى ، اول واحد بعتلى دعوة للمنتدى الجميل ده ، طبعا متشكرة على الرد ،وانا معاك جددددددا فى البداية اللى انتا ابديت بيها بجد ، وده فعلاً من اهم الاسباب اللى بتخلينى افضل المنتدى ده عن غيره ، ناس فى نفس السن تقريبا، نفس طريقة التفكير ، ناس على طبيعتها ، مش ناس يحسسوك انهم مسلمين وانتا مجوسى زى ما بيحصل من ادارات بعض المنتديات ، بجد ناس حابه تترسم وتتمنظر ، يالله ربنا يهديهم ، ميعرفوش ان بالاسلوب الطيب ممكن ياخدوا كل حاجة .، فعلاً اهدافك واضحة جدا جدا ومحددة ، واهداف كمان فيها نوع من التعاون الجاد ، بس كان واجب انك تنقل الفكرة دى للباقى عشان الكل يكون عنده اهداف على نفس المستوى ، حقيقى اهداف هايلة وحقيقى يا ريت اعرف فين موضوع دكتور عبد الرحمن اللى انتا اتكلمت عنه ،
**حقيقى متشكرة جداً على ردودكم بس الباش مهندس قال ان فى تعليق كتير على كلامى ، لو عاوز يطرح فكرة معينة او تعليق معين انا معنديش اى مشاكل وربنا يكرمكم ويكرمنا جميعاً

متشكرة جداااااااااااااا لكل اللى ردوا على الموضوع ، وسامحونى مش هقدر اكون موجودة الفترة الجايه عشان ارد على باقى المشاركات ، انتو عارفين فاضل على رمضان خلاص 15 يوم-ان شاء الله -ولازم الواحد يستعد كل سنة وانتم طيبين متنسونيش من الدعاء وانا هبقى ادعى للجميع